Harmonie Moutfort-Medingen

D‘Muséker vun haut begeeschteren d‘Muséker vu muer!

Haut huet d‘Militärmusék e flotte Concert fir d‘Kanner aus der Précoce a vun de Cyclen 1 an 2 gespillt a si fir d‘Instrumenter aus dem Orchester begeeschtert. Dobäi kruten d’Kanner Erklärunge vu Memberen vun der Harmonie Moutfort-Medingen a konnten nom Concert nach d‘Instrumenter probéiren, dëst mat der Ennerstëtzung vu Membere vun der Mutferter Musek a vun de Militärmuséker.

Opgepasst: D‘Umeldunge fir d‘Instrumentalcourse sinn op vum 20.-30. Abrëll fir déi aktuell Schüler vun der Museksschoul a vum 11/05-23/05 fir nei Schüler an dëst nëmmen online!
—> Mellt Iech un iwwer news@hmm.lu, wann Dir wëllt informéiert ginn, wann d‘Umeldungen opginn.

E Sonndeg war d‘Diplomiwwereechung vun der Regionaler Musekschoul UGDA Sirdall an der Gemeng Conter a mir haten engersäits Musikanten, déi op hirem Instrument vun hirem Kënnen iwwerzeegt hunn, an anerersäits och eis Mutferter Musikanner, déi begeeschtert hunn s gewisen hunn, wéi flott d‘Musizéieren am Orchester ass. 🎶🎵📯🎷🎺

De leschte Sonndeg hu mir mat de Kolleege vun der Harmonie Municipale Concordia Remich zesummen op der Réimecher Cavalcade matgespillt. 🚧👷👷‍♀️🦺

De Weekend ware mir Samschdesowes um Quizowend, organiséiert vun der Chorale Les Villageois Contern mat zwou Equipen um Start.
Mir hunn e flotten Owend matenee verbruecht a ware frou, fir matzemaachen a konnten eis um Enn iwwert 6 Fläsche Béier, gebraut vun den Amis de la Cervoise fir de 200. Anniversaire vun der Chorale, freeën 😃

Wow – wat e Concert!
Viru vollem Sall hunn eis Musikanten mat hiren Dirigenten, dem Charel Krysatis an dem Bernd Müller, alles ginn a goufe mat groussem Applaus fir déi gutt Leeschtung belount! Et ass eis gelong, eise Publikum an de Bann vun der Musek ze zéien a si hu sech vun de liewegen an energesche Melodie vu Lord Tullamore oder Around the Whiskey Jar matrappe gelooss a waren ergraff vun deene roueg-emouvante Téin vun Highland Cathedral oder Canterbury Chorale. Duerch de Programm gefouert hu gekonnt wéi ëmmer den Andy Ronck an de Rémy Toulotte.

Eise Special Guest – zwee Piper an een Drummer vun de Spirit of the Highlands Pipes & Drums – hu groussen Uklang fonnt, den Applaus fir hir zwee Wierker zesumme mat der Harmonie Moutfort-Medingen souwéi een Eenzelstéck vun hinnen – war frenetesch! E grousse Merci u si, datt si mat eis zesummen opgetruede sinn!🎶🏴󠁧󠁢󠁳󠁣󠁴󠁿

Virum Concert hate sech eng sëlleche Leit afonnt, fir hir Portioun Fish&Chips ze genéissen – zoubereet vun eisem Fëscherveräin, der Routa Moutfort-Medingen – e grousse Merci geet op dëser Plaz u si fir hir Aarbecht! 🐟

Mir soen Iech Merci, fir Är Ennerstëtzung, et huet eis immens vill Freed gemach viru sou engem begeeschterte Publikum ze spillen!